Payîza Peyvê
Ji kîşweran payîz e niha!
bo wê yeke
Sal him bi him zeman pîr dikin.
Heyv li kevan e geh, geh roj li ava
Bi kêlî û saet, roj û şev, bi av û hewa
Dem kal, ez pîrekal, zeman lal
Delalê, ji kîşweran payiz e niha!
Payîz e, dem dê xwe veguhere guherek din
Kêlî ê nepirsin ji te bo bibin saet
Û roj dê raneweste li te bo nebe şev;
Roj derew, şev derew, zeman nakeve xew…
Demsal e… ji kîşweran payîz e niha!
Siltanê herwext e, kî ye ne hêsirê zeman
Qurteke av in kêlî, jiyîn hilmek e bêguman
Aveke li herik e her çem, ber bi derya mirinê ve
Ne serî ne binî bi hêminî diherikî li vê
Çemek dimiçiqe herhal… ji kîşweran payîz e niha!
Li xwe vegerî, pelên katjimêrê bidî hev
Deh cild roj, deh cild şev dê bene ser hev!
Li şûna temenekî tu ê çi bikî ji tomarek pel?
Rûnî bisojînî wan yeko yeko
Tu yê temenê min û xwe bisotînî,
Tu ê rojekê jî venegerînî ji zeman!